Udal tasak mantentzea proposatu du EAJk
Udal Gobernu Taldeak egindako ordenantza fiskalen proposamenarekin ez dator bat EAJ ere. Udalak OHZ Ondasun Higiezinaren gaineko Zerga izoztea eta gainontzeko zergak KPIaren arabera, %2,2, igotzea proposatu du udalak. EAJk, ordea, udal tasak mantentzearen alde egin du. “Ezin da onartu KPI baino altuagoa den igoera, soldatak ez baitira proportzio berean igoko, eta gainera, askori euren soldatak murriztu edota mantendu dizkiete”, adierazi du Maite Peña bozeramaile jeltzaleak.
Peñaren iritziz, udalak “lehenik eta behin baliabideen kudeaketa hobetu eta gastuak murriztu beharko lituzke, diru bilketa herritarrengandik lortu ordez”.
Bestalde, OHZren gainean udala egiten ari den kudeaketa ez du egokitzat jo Peñak, eta hasteko, etxe hutsei buruzko errekarguan egindako salbuespenak zuzentzeko eskatu du.
Hainbat proposamen ere egin ditu EAJko bozeramaileak: 700 euroz azpiko diru sarrerak dituzten alargunei OHZ zergan salbuespenak egiteko eta merkatari nahiz ostalariak kontuan hartzeko, “sektorea indarberritzeko, horiek jendea herrira erakartzen baitute”.
