30 urte beteko ditu Errenteriako Herriko Etxeak
Larunbatean, hilak 19, ospatuko du Errenteriako PSE-EEk Morrongilleta kalean duen Herriko Etxearen urteurrena. Hain zuzen, aurten 30 urte beteko dira ireki zutenetik.
Jaialdi horretan gogoan izango dituzte hildako lankideak, eta eskerrak emango dizkiete euren afiliatu eta jarraitzaileei, “urte horietan zehar egindako lanarengatik, baita arriskuan egonagatik ere Herriko Etxera joateari ez uzteagatik”. Horrez gain, Herriko Etxea zuzendu duten idazkari orokorrek ere euren bizipen, oroitzapen eta pasadizoak kontatuko dituztela azaldu dute. Bukaeran, luntxa izango dela aurreratu dute.
PSE-EEk gogorarazi duenez, zabaldu eta bi egunetara erre egin zuten Herriko Etxea, eta ibilbide horretan, gainera, “27 atentatu” izan dituela esan du.
Urte horietan, hala ere, “poza eta itxaropena” ere bizitu dutela esan dute, eta uneoro afiliatu, jarraitzaile eta parte hartu nahi izan duten herritarrentzako ekintzak antolatu dituztela. Garai berri honetan, Herriko Etxea erreferentzia “ireki eta dinamikoa” izatea nahi dutela esan dute, eta era berean, informazio, aholkularitza, ekintza eta askatasun eta ezagutza gunea” izatea.
