55 urtetik gorakoek ere parte hartuko dute Gabon Abesti Sariketan
Ereintza elkarteak Gabon Abesti Sariketa antolatu du beste urte batez, eta aurten abenduaren 28an egingo dute Galtzarabordako kiroldegian. Oraindik urrun geratzen den arren, dagoeneko izena eman daiteke, eta hori azaroaren 4a eta abenduaren 10a artean egin beharko da.
Bi mailatan banatuta abestu ohi dute: haurrena eta helduena. Aurten, hala ere, berritasun moduan 55 urtetik gorakoek ere parte hartuko dute. Horiek, baina, lehiaketatik kanpo abestuko dute. Haurren Mailan lehiatuko duten taldeek 15 urtetik beherako kideez osatuta egon behar dute, eta Maila Herrikoian abestuko duten taldeek, berriz, 16 urtetik gorakoek osatuta. Taldeak gutxienez hamabi lagunekoak izan beharko dute, eta euskarazko bi gabon abesti koral kantatu beharko dituzte.
Izena emateko Gipuzkoako Abesbatzen Federazioak Tolosan duen Idiakez Jauregira zuzendu beharko da, bertara joanda edo 943 53 69 73 telefono zenbakira deituta edo koralkgaf[a bildua]euskanet.net helbide elektronikora idatzita. Era berean, taldeen parte hartzea mugatua dela jakinarazi dute, bederatzi talde Haur Mailan, eta zazpi Maila Herrikoian.
