Nafarroa Oinez-era joateko autobusak irtengo dira Errenteria-Oreretatik
Igandeko Nafarroa Oinez-era joateko autobusak jarri dituzte Errenteria-Oreretan. Bi geltoki izango ditu, lehenengoa Zumardian, 08:45ean, eta bigarrena, Beraunen. Bueltatu, berriz, 18:00etan egingo da, Tuteratik. Hain zuzen, Tuteran egingo dute Nafarroako ikastolen jaia aurten, Argia ikastolaren alde.
Txartelak lortzeko hiru tokitara jo daiteke: Orereta eta Langaitz ikastetxetara edota Lau Haizetara elkartera. Horrez gain, 687 32 88 38 telefono zenbakira deitu edo nafarroaoinez13autobusa[a bildua]gmail.com helbidera idatz daiteke.
Antolatzaileek gogorarazi dutenez, oso garrantzitsua da Nafarroa Oinez-era joatea, “ezaguna baita Nafarroako Gobernuak euskararen, euskarazko irakaskuntzaren eta ikastolen aurka daraman politika”. Horrez gain, gaineratu dute ikastolen aldeko jai guztiak “ezinbestekoak” direla “ikastola hezkuntza proiektuak ekonomikoki iraun ahal izateko”.
