Gaztetxera gerturatzeko deia egin dute
Ostegunero biltzen da gazte asanblada Errenteria-Oreretako Zabala-enea II gaztetxean ideiak bildu eta horiek aurrera nola eraman erabakitzeko. Gaztetxea “denen etxea” dela gogorarazi dute, eta hura toki bizi eta parte hartzailea izatea nahi dutela esan dute. Zentzu horretan, herriko gazte guztiak animatu dituzte bilera horietan parte hartzera. 18:00etan elkartzen dira gaztetxean bertan.
Hainbat proiektutan ari direla lanean jakinarazi du gazte asanbladak: sukaldea, boulderra, reggae taldea, musika taldea, komunikazio gela eta auzoko parrilla, besteak beste.
Hilabete guztian zehar egingo ditu ekintzak Oreretako gaztetxeak; izan ere, bere urteurrena ospatuko du urrian. Hala ere, urte osora zabaldu nahi dute egitaraua, gaztetxeak gazteen nahi eta beharrei erantzuteko tresna izan behar duela aldarrikatu baitute.
