Lantegi eta plazetan biltzeko deia egin du gehiengo sindikalak, etzi, Herrira-ren alde
ELA, LAB, ESK, STEE-EILAS, EHNE, HIRU, CGT eta CNT sindikatuek lantegien aurrean eta herrietako plazetan elkarretaratzeko deia egin diete herritarrei etzirako (ostirala). 12:00etan egingo dituzten enpresen atarian nahiz plazetan elkarretaratzeak, eta horietara, langileez gain, herritar oro gonbidatu dute.
Sindikatu daitzaileek esan dute “erabat” arbuiatzen dutela Herrira-ren kontrako “ekintza judizial, polizial eta mediatiko hau gidatu duen erabaki politikoa”, eta askatasun “funtsezkoenak urratzen” dituela iritzi diote. Hala, Herrira-ren lana aitortu dute, eta haiekin orain arteko harremana sendoa izan dela esateaz gain, aurrerantzean hala izango dela ziur daude: “Herrira-ren ekimen guztiek hiru ezaugarri dituzte. Baketsuak izan dira, elkar ulertuz pluraltasuna izan dute helburu, eta beti giza eskubideen defentsa izan dute ardatz”.
Horrela, atxilotuei “elkartasuna” adierazi diete sindikatuek, “berehala libre utz ditzatela exijitzen dugu”. Hartara, larunbatean Bilbon egingo den manifestazioan ere parte hartzeko esan diete langileei eta herritarrei oro har.
