"Erronkaz beteriko" ikasturtea hasiko du Oiartzungo Sortuk
Bi batzar egingo ditu, bata aste honetan eta bestea urriaren 29an.“Kurtso hau erronkaz beteta dago, eta oso emankorra izan daiteke baldin eta gure lan militantea behar bezala planifikatzen badugu”, azaldu du Oiartzungo Sortuk. Eta bide horretatik, bi herri batzar egingo ditu: lehenengoa ostegun honetan, hilak 26, izango da (19:00etan, udaletxean). Sorturen Plangintza nazionala aurkeztuko dute eta horrez gain Euskal Bidearen nondik norakoak azalduko dituzte. Azken puntu bezala, Gipuzkoako herrialde plangintza aurkeztu dute, hau da, herrialde mailan Sortuk dituen erronka nagusiak aurkeztuko eta eztabaidatuko dituzte.
Bigarren herri batzarra urriaren 29an izango da (19:00etan, udaletxean). Bi puntu jarriko dituzte mahai gainean: alde batetik, Europako Legebiltzarrerako hauteskundeetara Sortuk eramango duen planteamendua eztabaidatuko dute, beste bestetik, 2013/2014ko plangintza politikoa, herri mailakoa, osatu, eztabaidatu eta onartuko dute.
Bi herri batzarrek ordubete eta 45 minutuko iraupena izango dute.