![Bidasoaren sasoi berrirako jokalari taldea](http://bidasoa.hitza.eus/site/files/2013/09/bidasoa-300x162.jpg)
Bidasoaren sasoi berrirako jokalari taldea
Asobal Ligako bigarren partida jokatuko du gaur Bidasoa-Irunek, etxean, Artalekun. Sei urte pasatu dira goi mailako ligaren partidarik ez zela jokatzen Irungo kiroldegian, 2007ko maiatzaren 26tik hain zuzen. Gaurko partida (19:00etan hasiko da) oso berezia izango da Bidasoarentzat, taldearen ikuspegi osotik: jokalariak, arduradunak, zaleak… Frigorificos Morrazo Galiziako taldea izango dute aurrean horiek. Bi taldeak oso egoera ezberdinean iritsi dira bigarren jardunaldi honetara:
Bidasoak Errioxan lehen partida nabarmen galdu zuen, eta Morrazok Anaitasuna 24-20 gainditu zuen.
Zaleek ilusioa dute, asko. Horren erakusle da 150 bazkide berri dituela eskubaloi taldeak. Neurketa zaila izango da gaurkoa ere, baina harrobian oinarritutako egitasmoek hori dute, zailtasunei aurre egin beharko dio Bidasoak, etxekoekin.