EAJk Orereta Ikastola omenduko du
Mende erdia bete du aurten Orereta Ikastolak, eta Errenteria EAJk ere gogoan du data berezi hau. Hori dela eta, bertako presidente, zuzendari, irakasle, guraso eta ikasleei egindako lana aitortu die, eta hainbat ekitaldi antolatuko ditu urteurrenaren testuinguru horretan.
Oraindik ez ditu datak zehaztuak, baina bai, ordea, ekitaldiak: LOMCE legea gainean dela eta, mahai inguru “anitz eta zabala” antolatuko du lege horrek utziko duena ezagutarazteko, eta bestetik, jai giro ukitua emanez, puzgarriak eta txokolate jatea prestatuko ditu txikienentzat.
Gaur goizean egin dute agerraldia Maite Peña EAJ zinegotziak, Nieves Jauregi Errenteriako Batzordeko presidenteak, eta ondoan, Orereta Ikastolako bi presidente izan dituzte: Mikel Errindo eta Inaxio Oliveri. Zentzu horretan, biek ala biei eskerrak eman dizkie ikastolan egindako lanarengatik. Lehengoa 1975tik 1979ra izan zen presidente, eta bigarrenak lekukoa hartu zion 1983ra arte.
Ikastolaren hastapenak izan dituzte gogoan, eta nola Frankismoaren testuinguruan ere ikastola aurrera ateratzea lortu zuten. Handik egonkortasuna lortu zutela azaldu dute, eta egun ezagutzen den ikastola. Eskerrak eman dizkiete alde guztiei herria euskalduntzen, hezkuntza indartsu eta posible egiteagatik haur eta gazteek euren ikasketak eta formazioa euskaraz jasotzea.
