Gipuzkoako Lur Funtsak Urrullo eremuan prestatutako bost lur sailak banatuko ditu bihar
Lezoko Urrullo eremuan prestatu dituen bost lur sailak nekazari berrien artean banatuko ditu bihar Gipuzkoako Lur Funtsak. Goizeko hamaiketan egingo dute ekitaldia Urrullo Baserrian eta bertan izango dira Martin Garitano Ahaldun Nagusia; Koldo Lizarralde, Landa Garapeneko Zuzendaria; Mikel Zendoia, Behemendiko ordezkaria; Xabier Esteban, Ekoguneko proiektu arduraduna, eta lurrak landuko dituzten bost nekazariak.
Urrulloko agroaldea martxan jartzeko hitzarmena joan den otsailean sinatu zuten Gipuzkoako Foru Aldundiak, kutxa Ekoguneak eta Behemendi Elkarteak. Lezokoa, Gipuzkoako Nekazaritza Lur Funtsaren lehen ekimena izango da, horrenbestez. Bost lanpostu zuzen sortuko dituen agroaldeak, 130.000 euroko inbertsioa izan du eta hitzarmena sinatzeko unean aldundiaren politikan “urrats estrategiko” gisa definitu zuen Jon Peli Uriguenek, Berrikuntza, Landa Garapen eta Turismoko diputatuak.
Elikadura subiranotasuna
102.820 metro koadroko azalera du agroaldeak eta nekazaritza ekologikoa lantzeko erabiliko dira. Hektarea banako bost baratze prestatu dituzte horretarako. Egitasmoaren atzean, elikadura subiranotasunaren kontzeptua dagoela nabarmendu zuten joan den otsailean arduradunek, “kalitatea eta gure lurren biziraupena bermatuko duen proiektua delako, eta azken batean gure osasuna, kalitatezko produktuak ekoiztuko ditugulako bertan”.
