Bitamine Faktoriak Banako bisitatuko du ostiralean
Aste honetako ostiralean hamabosgarren Kasual Friday ekitaldia antolatuko du Irungo Olaberria auzoan egoitza duen Bitamine Faktoria artista taldeak. Askotariko arte adierazpideak eta musika uztartzen ditu Bitaminek hileroko hirugarren ostiralean eta hurbiltzen direnek arteaz eta beste hainbat gaiez eztabaidatzen jardutea bilatzen du. Oraingo honetan, baina, Olaberriko tailerrak utzi eta Banakon egingo dute urriko Kasual Friday-a.
Arteak eta musikak bat egingo dute ostiralean Banakon. Batetik, Ibon Mainar artistaren lanak ikusteko aukera izango da; irudiak eta bideoak baliatuz, kolorez eta fantasiaz betetako lanak sortzen ditu Mainarrek. Eta musikaz, Buffalo taldea arduratuko da. Hirukote zarauztarrak musika jarriko die Mainarren proiekzioei eta Txiplaoko tabernan post rock eta jazz giroa sortzen lagunduko du.
Bitamine artista taldearen ostiral guztietan bezala, zer jan eta zer edan izango da ostiral honetan, Banako tabernan, 20:00etatik aurrera.
