Hibaika zoriondu du Berdintasun Kontseiluak
Joan den igandeko garaileak nortzuk izan ziren argi dauka Errenteriako Berdintasun Kontseiluak: kolore beltz eta gorriak, Hibaikarenak. Zentzu horretan, “harro” dagoela esan du: “Harro gaude, Hibaikako emakumeek eraman dutelako lehen aldiz gure herria Kontxako estropadara, arraunaren gorenera. Harro gaude Kontxara joan eta bigarren egin dutelako, bikain aritu den Zumaiaren atzetik. Harro gaude, Hibaikako emakumeak espontsorizatuz, balentria horren parte sentitzen garelako”.
Berdintasun Kontseiluak gogorarazi du emakumeen hiru talde espontsorizatzen dituela urtero, eta Hibaikak bi aldiz lortu duela bultzada hori, “apustuek emaitzak ematen dituztela sinetsita. Sinesmen osoa genuen, eta Hibaikako emakumeek lortu dute”.
Kontrako bidetik, Hondarribiari eta bertako Alardeari egin dio erreferentzia Berdintasun Kontseiluak: “Urrutira begiratu beharrik ez dago berdintasuna lortzeko egin dugun bideaz ohartzeko. Gizonen txanda, besterik esaten ez den bitartean, irabazle izan diren arraunlari horien herrira begiratu besteri ez dago. Tristea da, gero, plastiko beltzen herria izatea”.
