Iazko txupinaren irudia. Haurrak dira lehenak jaietan murgiltzen
Hiriko bandera balkoian jarrita, iganderako arropa plantxatuta, hilaren 10ekoa eta 11koa ere bai, eta traineruaren garaipena ospatzeko txanpan botila hozkailuan. Dena prest dute hondarribiarrek urteko aste bereziena ospatzeko, Guadalupeko Amaren omeneko astea. Ia urtebete zain egon eta gero iritsi dira herriko festak. Gaurtik hasita arrazoi asko izango dituzte Hondarribiko biztanleek zein herrira hurbiltzen direnek zoriontsu izateko: alarde eguna da bat, askorentzat nagusiena, baina herriko jaiek beste hainbat egun berezi dituzte, arrantzaleena, baserritarrena, gaurkoa, eta beste dozenaka ekitaldi hilaren 11 bitarte inor ez aspertzeko modukoak. Ondo pasatu nahi duenak, lortuko du Guadalupeko Amaren jaietan.
Jaien hasierako uneak bereziki maite dituztenentzat ere, egokiak dira Hondarribikoak, ez direlako behin bakarrik hasten. Zein egunetan hasten diren ere ez daukate oso argi bertakoek. Jaien abiatze ofiziala hilaren 7ko eguerdian izaten da, baina pixkanaka-pixkanaka bezperak, hilaren 6ak, garrantzia hartu du eta udala bera edukiz betetzen hasi da eta jada udal programan jai egun bezala ageri da. Bi egun gutxi ez, eta festak Guadalupeko santutegian egiten diren nobenekin abiatzen direla esaten dutenak asko dira.
Goiza umeena, gaua gazteena
Duela urte gutxi arte koadrilen afariak egiten zuen berezia hilaren 6a, baina egun, afaldu aurretik ekitaldi jendetsu asko pilatzen dira, horien artean zezen puzgarrien entzierroaren Haurren Txupinazoa, herriko jaiei txikiek ematen dieten hasiera handia. Haurren entzierroan egon izan direnek badakite ekitaldiak jaien hasiera ofiziala izateko elementu guztiak biltzen dituela, txupina jaurti aurreko urduritasuna eta ondorengo alaitasun eztanda, haien artean. Sekulakoa izaten da eta, beste txupinazo batzuekin alderatuta, garbiagoa da hilaren 6koa, udaletxeko balkoitik erortzen den puxika olatu erraldoiak eta konfeti euriak ez baitute ez bustitzen, ezta zikintzen ere.
15:00etan hasiko dira baltsak muntatzen
Gaur ere Bikingo Marea da, gaur izango dira margo eta graffiti lehiaketak, gaur egingo du Herrirak preso eta iheslarien aldeko brindisa eta gaur da, nola ez, afaria koadrilarekin. Eta eguna doinuz biribiltzeko, bi kontzertu handirekin amaituko da gaurko eguna, jaien hasierakoa, edo hasierako egunaren bezperakoa, bakoitzak nahi duen bezala. Los Suaves rock talde galiziar mitikoak Bentan joko du eta Hondarribiko Hiria Musika Bandak, Gipuzkoa plazan. Bi jai eremuak leporaino beteko dira eta aurreko egunetan alardeko entseguekin bezala, sekulako festa giroa izango da Portuan zein Alde Zaharrean.
