Baratze ekologikoen eskabideak hilaren 16ra arte aurkez daitezke
Arramendin egingo diren baratze ekologikoetan interesa dutenek bi aste izango dituzte euren eskaerak udaletxeko erregistroan aurkezteko: hilaren 16ra arte. Kutxak Ekogunean daraman gizarte ekintzak sustatutako egitasmoa da, eta Baratzeen Parke Sarearen barruan dago. Ekogunearekin batera udalak finantzatzen du.
30 metro koadro edo 60 metro koadroko baratzeak eskaini dituzte, eta horien truke hasieran fidantza bat ordaindu eta urtero kanon bat ordaindu beharko da mantentze lanak ordaintzeko. Baratza txikienen kanona 45 eurokoa da, eta besteena, berriz, 90 eurokoa. Fidantza 100 eurokoa da, eta adjudikazioa bukatzean bueltatu egingo dute.
Baratzeen funtzionamendua printzipio batzuetan oinarritu dute sustatzaileek: lur zatia kontserbatzea eta mantentzea, instalazioak erabiltzean besteekiko begirunea izatea, nork bere burua hornitzea eta ongarritzeko produkturik ez erabiltzea.
Deialdi berezia
Batik bat aurre izen ematea egin zutenei luzatu die udalak deia, bere garaian eskatu ez zen dokumentazioa orain aurkeztu beharko baitute.
Zein dokumentazio aurkeztu behar den jakiteko Errenteriako Udalaren webgunean edo Herribizian kontsulta dezakete interesdunek.
