Berrordainketaren kontrako sinadurak biltzen hasi da Duintasuna
Gaur goizean jarri du martxan Duintasuna erretiratuen elkarteak botiken ordainketa partekatuaren kontrako kanpaina bat: berrordainketa kentzeko sinadurak bilduko ditu. Araba, Bizkaia, Gipuzkoa eta Nafarroako beste elkarteekin batera jarri du martxan, eta lau lurraldeetan 10.000 eta 17.000 sinadura artean biltzea da helburua. Horiek Nafarroako Parlamentura eta EAEko legebiltzarrera bidaliko dituzte.
Zehazki, pentsiodun eta 65 urtetik gorakoen Osakidetzako errezeta guztiak dohainik izatea eskatuko dute, eta osasun zentroetako joan-etorriak, anbulantziak, protesiak, makuluak, gurpil aulkiak eta “ordainarazi nahi duten guztia” dohainik izatea “orain arte bezalaxe”.
Dagoeneko 417 botika errezeta gorrietatik atera dituztela gogorarazi dute, eta egun “guztiz osorik” ordaintzen dituztela. “Botika horiek errezeta gorrietatik ateratzeaz gain, asko neurrigabeki” igo dituztela jakinarazi dute.
Tiketak gorde
Duintasuna elkarteak, gainera, farmazian erosten dituzten botika guztien tiketa gordetzeko galdegin die erretiratu eta 65 urtetik gorako guztiei. Egiaztagiria, farmaziaren seilua eta sinadura ere gordetzeko eskatu die “bere garaian, Eusko Jaurlaritzari erreklamazioa egiterakoan, beharko diren ziurtagiriak eskura izateko”.
