Bihar hasiko du EGOk Hondarribian amaituko duen bira "zailena"

Txaikovskiren '5. sinfonia' interpretatuko dute Euskadiko Gazte Orkestrako musikariek Donostian, Bilbon eta Hondarribian

admin

Bidasoa

2013/07/20

Dagoeneko salgai daude asteazkeneko saiorako sarrerak, turismo bulegoetan

Euskal Herriko Gazte Orkestrak (EGO) udako birari ekingo dio, bihar, Gasteizko Principal antzokian. Etzi Bilboko Euskalduna jauregian aritu dira 70 musikariak, asteartean Donostiako Viktoria Eugenian, eta asteazkenean Hondarribiko Itsas Etxea Auditoriumean, 20:30ean. Emanaldi horietan guztietan Piotr Ilitx Txaikovskiren 5. Sinfonia izango da interpretatuko duten obra nagusia. Era berean, Carl Maria Von Weberren Der Freischutz ere joko dute. Naturaz gaindiko gaiei eskaini zien lehen drama erromantikoen artean dago lan hori. Kontzertu areto eta opera antzokietako pieza “gustagarrienetako bat” da obertura hori, Juanjo Ocon orkestraren zuzendariaren iritziz. Zuzendariaren arabera, orkestraren inoizko proiektu “handinahiena eta zailena” da aurtengoa. Kontzertuetan joko dutena entseatzeko, musikari gazteek musikaren munduan ibilbide luzea egin duten zazpi irakaslerekin topaketak egin zituzten Eibarko Hezkuntza Esparruan, joan den hilaren 13tik 15era. “Programazio zailaren” aldeko apustua egin dute EGOkoek, musikari gazteak errepertorio profesionalean trebatzea nahi dutelako. Merkatu “geroz eta globalago eta lehiakorrago” batean sartzeko metodo “ona” dela iruditzen zaio Oconi.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.