Herrian areto futbola ezagutzera emateko asmoz, txapelketa jokatuko dute bihar

admin

Bidasoa

2013/07/12

Iñigo Narbarte, Unai Unsuain eta Odei Fraile, goizean egindako agerraldian

Lehenengo aldiz areto futboleko txapelketa jokatuko dute Errenteria-Oreretan Gamon Kirol Elkarteak antolatuta. Bihar izango da txapelketa, 09:00etatik aurrera Galtzarabordako kiroldegian, eta finala 19:30ak aldera jokatuko dutela aurreikusten dute.Herrian areto futbola ezagutzera eman nahi dute antolatzaileek eta behin ezagutzera emanda berau sendotzea: “Hemen kirol indartsuenak eskubaloia, futbola… dira eta honekin jendeari ezagutzera eman nahi diogu areto futbola”. Txapelketan hamabost taldek eman dute izena eta horrekin oso pozik daudela azaldu du Iñigo Narbarte antolatzaileak: “Gehienez hamasei talde aurreikusten genituen, beraz, oso balorazio positiboa egiten dugu”. Hala, guztira 150 kirolari inguruk hartuko dute parte. Talde horietatik 11 Errenteria-Oreretakoak dira (Orereta iturgintza, Panier, Lete Itzulpenak, Inter de Moron, La quinta de Can, Drink Team, Steaua, Bukowsky, Calciatore, Tuercebotas eta Team Rocket). Oiartzundik Piti taldea etorriko da, Donostiatik Huracam Team taldea eta Andoaindik Buhos de Axpe eta Ekain. “Herriko hainbeste taldek parte hartzea oso ondo dago eta kanpotik etortzea oso garrantzitsua da guretzat”, adierazi du Odei Fraile antolatzaileak. “Joko garbia egotea nahi dugu” Helburua ondo pasatzea den heinean, joko zikinik ez dutela onartuko nabarmendu dute: “Joko garbia egotea nahi dugu eta epaileak txartel gorri zuzena ateratzen badio norbaiti, hurrengo urtean ez du txapelketan parte hartuko. Irudi ona eman nahi dugu; gainera haur asko egongo dira ikusten eta ez dugu gaizki jokatu nahi”. Partidak 40 minutukoak izango dira eta kanporaketa bidez jokatuko dira. Berdinketa suertatuz gero, penaltietan erabakiko da irabazlea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.