Galesen emango du kontzertua Landarbasok
Landarbasok gaur bidaiatuko du Galesera han egiten ari diren musika jaialdi batean parte hartzeko: 65. Llangollengo Nazioarteko Musika Jaialdia. Lehenengo emanaldia bihar izango du, eta larunbatera arte zenbait ekitalditan parte hartuko du.
Hainbat herrialdetatik joandako taldeekin lehiatuko da Landarbaso: Argelia, Australia, Belgika, Britainia Handia, Kanada, Txina, Txekiar Errepublika, Alemania, Ghana, India, Maroko, Errusia….
Bihar goizean hasiko da folklore lehiaketa. Landarbasok 40 partaide ditu, eta bi taldetan banatuta, A eta B, parte hartuko du —oinarrien arabera, ezingo dira 30 partaide baino gehiagokoak izan—. A taldeak Hator, hator mutil etxera eta Akerra ken kantatuko du. B taldeak, berriz, Neure maitena eta Aritz Adarrean-Kattalin.
Hurrengo egunean, erakustaldi kontzertuetako batean parte hartzera gonbidatu dute. Beste bi korurekin batera abestuko du.
Etzi goizean, azkenik, polifoniako modalitatean parte hartuko du, eta honako programa prestatu du. Juan Gutierrez de Padillaren Deus in adiutorium meum intende, Julio Dominguezen Deus qui iluminas eta Erik Esenvalds Stars. Maila horretako partaideek World Choir Competition-en parte hartu ahal izango dute. Hori arratsaldean jokatuko dute, eta ekitaldi horretako abesbatzik onena aukeratuko dute.
