![Pasaiako arraun taldeetako ordezkariak, udaleko kideekin](http://bidasoa.hitza.eus/site/files/2013/07/DSC_0245-300x198.jpg)
Pasaiako arraun taldeetako ordezkariak, udaleko kideekin
KAE1 Ligako hirugarren estropada (11:30ean) eta Emakumeen Gipuzkoako Ligako lehena(11:00etan) izango dira jokoan etzi (igandea) Pasaiako badian. KAE1ekoan Oarso Bidasoko ordezkari bakarra Trintxerpe-Illunbe izango da; urdinek azken estropadan izan zuten hobekuntza berretsi nahi dute etxean, eta lehen lauen artean sartzea izango dute helburu nagusi. Trintxerpetarrekin batera Busturialdea-Elantxobe, Santurtzi, Camargo, Donostiarra, Ondarroa, Getaria, Orio B, Zierbena, Santoña, Lekeitio eta Zarautz izango dira lehian. Pasaiako XXIX. Ikurrina jokoan izango dute.
Pasaiako badiako ohiko prozedura jarraituko du estropada horrek. Hala, irteera puntua San Pedro eta Donibane artekoa izango da, eta handik bi traineruk itsasorantz abituko dira, eta beste bi badiaren barrura; hortaz, lau traineruko hiru txanda izango ditu KAE1eko estropada horrek.
Emakumeen Gipuzkoako Ligako estropada 11:00etan hasiko da. Erlojupekoa izango da, eta Hibaika, San Juan, Hondarribia, Bizkaia, Zarautz, Orio eta Zumaiak parte hartuko dute.
Herenegiun egin zuten bi banderen aurkezpena Donibaneko udaletxe zaharrean. Bertan izan ziren Pasaiako arraun klubetako ordezkariak, Oihane Oronoz Donibaneko alkateordearekin batera.