"Miopia patriarkalaren kontra", betaurreko moreak Antxoko jaietan
Antxoko Harremantxo talde feministak eragile izan nahi du sanferminetan. Jai parekideak aldarrikatu eta bultzatu nahi dituzte, eta horretarako ekimen berezia abiaraziko dute barrutiko festetan, betaurreko moreak banatuko dituzte: “Jaietan guztiak irteten gara kalera, eta herriko plaza gure etxe bihurtzen dugu. Gure: denona; zurea eta nerea. Era anitzeko erasoak saihesteko eredu patriarkalaren aurreko ikuspuntua zabaldu nahi dugu, jai parekideena”.
Horren berri emateko, bi ekimen dituzte esku artean. Bat egina dute, bideoa da (behean ikus daiteke). Bestea, jaien egitarauaren barruan dago: bihar (osteguna), 18:00etatik aurrera, bideoen proiekzioa egingo dute Gure Zumardian, bereziki prestatuko duten gunean. “Aniztasuna, elkartasuna, indarkeriari aurre egiteko gaitasuna eta jai giroa bultzatu nahi dugu. Eta jaiak parekidetasunean bizi. Horregatik herritar oro hurbiltzea nahi dugu”, esan dute Harremantxoko kideek.
