Antxotarrak, Molinaon akanpatuta
Antxoko hainbat herritarren ekimenez, Molinao auzoan I. Akanpada Herrikoia egiten ari dira hamarnaka antxotar. Akanpadaren helburuak bi direla jakinarazi dute ekimenaren bultzatzaileek: batetik, Molinao aldeko parkea birgaitzea, eta bestetik hori ere zaindu behar dela ohartaraztea. Izan ere, herritarren arabera, nahiz eta administrazio aldetik zonalde hori Donostia izan, antxotarrek erabiltzen dute gehienbat eremu hori guztia, eta haiei ere dagokie zaintzea.
Hala, gaur, 09:30ean gelditu dira Gure Zumardian Molinao aldera joateko. Bertan kanpalekua ezarri dute, eta garbiketarekin hasi dira. Batez ere belar txarrak eta sastraka kentzen aritu dira, eta goizean jada belarrak hartuta zeuden hainbat eremu guztiz garbitu dituzte, eta erabiltzeko prest utzi dituzte; horien artean gordeta zeuden eskailera batzuk ere agertu dira. Garbiketaren ondoren bazkaria, jokoak, askaria eta afaria egingo dituzte. Eguna bukatzeko, gaueko txangoa eta zinema saioa egingo dituzte kanpalekuan. Gaua bertan igaroko dute. Bihar goizean, gosaldu ondoren, dendak jaso eta paella jatea egingo dute.
