San MIgel eta Alonso, jaialdiaren xehetasunak azaltzen Olagarro elkartean
Hilaren 21ean, ostiralarekin, Hondarribiko Stop Kaleratzeak taldearen aldeko zesta punta jaialdia egingo dute Jostaldi pilotalekuan, Hondarribiko Pilota Eskolaren ekimenez. Jai Alive enpresako puntista profesionalek hartuko dute parte, eta beste zenbait eragilek ere lagunduko dute, hala nola, Izugarria Buruhandien eta Erraldoien konpartsak, Sebastopoleko Titiriteroak taldeak, Hondarribiko Gazte Asanbladak eta udalak. Gaur aurkeztu dute ekimena, Olagarro elkartean. Bertan izan dira, besteak beste, pilota eskolako kide Ortzi Alonso, Hondarribiko Stop Kaleratzeak taldeko Maite San Migel eta jarduneko Munduko Zesta Punta Txapelduna den Mikel Egiguren Jai Alive enpresako pilotaria.
Alonsok azaldu duenez, zerbait egin nahi eta plataformarengana jo zuten pilota eskolakoek: “Zerbait egin nahi genuen, ikusita zein nolako drama den. Zesta puntako jarduna izango da, hori delako gure tresna, baina guretzat zita berezia izango da, kaleratzeen egoera zein den ezagutarazi nahi dugulako, bihar gutako edozein izan daitekeelako kaltetua”.
Arratsaldeko zortzietan hasiko da kirol jaialdia, baina aurretik kalejira egingo dute herriko buruhandi eta erraldoiekin, ordubete lehenago Azken Portutik abiatuta (Arrantzale auzoa). Kalejira Jostaldira iritsita munduko dantzen erakustaldia izango da, Sebastopoleko Titiriteroak-en eskutik, eta ondoren hasiko dira partidak.
Pilotarien konpromisoa
Egiguren, aurkezpenean
Profesionalen jaialdia izango da, Jai Alive enpresako pilotariekin, baina sarrera borondatezkoa izango da eta diru hutxak jarriko dituzte nahi duenak ahal duena eman dezan. “Bildutako diru guztia etxe gabe geratzeko arriskuan daudenen epaiketetako gastuak arintzeko izango da”, argitu du San Migelek.
Ideia ezagututa Jai Alive enpresak bat egin zuen eta enpresako pilotariak Stop Kaleratzeak taldearen elastikoekin jokatzeko prest azaldu ziren. “Pilotariak laguntzeko gaude, are gehiago gizartean hainbeste eragin duen gai honetan. Nahi duten horretan laguntzeko prest gaude, bai Jai Alive enpresa, bai pilotariak”, azaldu du Mikel Egiguren puntistak.
Egitaraua
- 19:00etan, kalejira, Hondarribiko Izugarria elkarteko erraldoi, buruhandi eta trikitilarien konpartsarekin. Ibilbidea: San Pedro, Harresilanda, Biteri kalea, Jostaldi.
- 19:30ean, munduko dantzen erakustaldia, Sebastopoleko Titiriteroak elkarteko dantzarien eskutik.
- 20:00etan, profesionalen zesta punta jaialdia. Pilotariak zehazteke daude.
