Irungo sukaldariak, Bioterran
Ficoban asteburuan egin dute Bioterra azoka. Irungo Udalak egin du azokaren gaineko lehen balorazioa, eta bertan, 15.500 bisitari izan direlako pozik agertu da. Udalaren esanetan, azoka baino askoz gehiago da Bioterra, “hiriarentzako ekimen oso garrantzitsua da. Azokaz gain, hiriak bertan ere horren onurak jaso ditu, eta hori beti da albiste ona”. Horren adibidea Pintxo Bonoa jarri du udalak; horren barruan zeuden hamabi tabernetako bakoitzak 300 pintxo baino gehiago banatu ditu, eta hori eredutzat jo du Miguel Angel Paez Sustapen Ekonomikorako ordezkariak: “Azoka eta hiria batzea lortu dugu”. Azoka bitartean hotelen okupazioa %80 eta %100 artekoa izan dela esan du udalak.
Gainera, Irungo hainbat sukaldarik egindako ekarpena ontzat jo du udalak. Irun Dastatu ekimenaren barruko tailerrak egin zituzten, besteak beste, Iñigo Lavado eta David Rodriguez sukaldariek, baita Brasil gozotegiko Koldo Salinasek ere.