Euskara, Hendaiako erdialdean ozen
2013ko Irakurraldia abiatu dute Hendaiako Mediatekan 11:00etan. Ordu horretatik 20:00ak arte Itxaro Bordaren Boga boga liburua ozen irakurriko dute 111 pertsonak, gehienak Hendaiakoak, baina badaude Euskal Herriko beste hainbat tokietatik etorritakoak ere. Akelarre Kultur Elkarteak antolatu du ekimena, beste hainbat talderen babesarekin. Bertako kide Miren Intxaustik irakurketa saio erraldoia hasi aurretik esan du euskal nortasunaren zati garrantzitsuenetakoa dela euskara, “eta irakurraldian nortasun hori erakustera goaz, ozen euskaraz irakurriz”. Itxaro Bordak berak hasi du Irakurraldia, ondoren Jean Baptiste Salaberri Hendaiako auzapezak hartu dio lekukoa, eta Boga boga-ren zirrikituak irakurtzen hirugarrena Sustrai Colina bertsolaria izan da. Hortik aurrera, 20:00ak arte, beste 108 lagunek izango dute esku artean, eta hitzean, euskarazko eleberria.
