Gazte errepublikano baten istorioa kontatuko du bihar Marcelo Usabiagak
Marcelo Usabiaga eta bere seme Miguel Usabiagak azken horrek idatzitako La joven guarda. Una vida de compromiso y lucha liburua aurkeztuko dute bihar, 19:30ean, Xenpelar Etxean. Usabiaga antifrankismoaren erreferentzietako bat da Gipuzkoa mailan. Bere semeak idatzitako liburuaren protagonista, hain zuzen, gazte errepublikano bat da, eta Errepublika garaian hartu eta inoiz utzi ez zuen konpromiso politiko eta soziala azaleratuko du.
Usabiaga irundarra langile familia bateko kidea zen, eta gaztea zela dagoeneko Errepublikarekin amets egiten zuen. Errepublika aldarrikatu ondoreneko urteak militantzian iragan zituen. Espainiako Gerran II. Errepublikako teniente izan zen Valentzian, eta hor bertan atxilotu zuten. Hainbat kartzeletatik pasatu eta gero, ihes egitea lortu zuen, eta Frantziara joan zen. Gerrilla antifrankistarekin, muga pasatzea lortu zuen, baina berriro atxilotu eta 21 urte pasatu zituen espetxean. Egun 97 urte ditu Usabiagak.
Liburua Xenpelar Etxean bertan jarriko dute salgai.
