Jaurlaritzako eta udaleko ordezkariak, ostiral goizean arrapala berrian
Ana Oregi Eusko Jaurlaritzako Ingurumen eta Lurralde Politikako sailburua Hondarribian izan zen ostiralean, belaontzietarako arrapala eta plataforma martxan jartzeko ekitaldian. Oregiz gain, Aitor Kerejeta alkatea, Hondarribiko Klub Nautikoko ordezkariak, Almudena Ruiz de Angulo Eusko Jaurlaritzako Azpiegituretako zuzendaria eta Edurne Egaña Euskadiko Kirol Portuetako (EKP) zuzendaria izan ziren bertan eta Arrantzaleen kofradia eta EKPren instalazioetan bisita egin zuten.
Ingurumen eta Lurralde Politikako sailburuak esan zuenez, “Hondarribiren ezaugarri nagusia itsasoarekiko lotura da, bai arrantza sektoreagatik, bai kirol eta aisialdi sektoreengatik; hogeitaka motorrezko itsasontziren eta belaontziren amarratzeko eta Hendaiako mugakideekin nabigatzeko lekua da. Portu eredugarria da izan; aparteko baliabide turistiko eta ekonomikoen iturri da Hondarribiarentzat, eta Europako Batasuna sustatzen ari den itsas turismoaren kokaleku izateko aukera asko ditu, duela egun gutxi Itsasoaren Europako Egunaren ildotik Maltan egindako biltzarrean adierazi zen bezala”.
Kofradiako instalazioak bisitatu zituzten
Arrapala berria Hondarribiko bela-eskolaren ondoan, arrantza-portuko zabalguneen hego-mendebaldean kokatuta dago eta bertan zegoen garai bateko arapala ordezkatuko du, egoera oso txarrean zegoena.
Hondarribiko udalak bere gain hartu zituen bela-eskola kokatzeko beharrezko eraikuntza-elementuak gauzatzeko lanak eta Eusko Jaurlaritzako Portu-azpiegituretako zuzendaritzak plataforma handitu eta berritzeko lanak gauzatu ditu. Obrak egiteko, guztira, 447 mila euro inbertitu dituzte lan horietan.
Plataforma ere handiagoa
Arrapala berriaren obren bidez, Klub Nautikoaren egungo plataforma handitu da; 40 metro gehiago luzeran eta 19,75 metro gehiago zabaleran. Plataforma berria egungo eremuaren kota berdinean eraiki denez, gorabeherarik gabeko espazio oso bat lortu da. Gainera, ontzi arinak lehorreratzeko arrapala egin da (11,8 metroko zabalera, 47 metroko luzera eta % 12,6ko pendiza) eta pantalanera sartzeko eskaileretan eskudel bikoitza ipini da. Halaber, egungo argiztapen-lerroa luzatu da, kale-argi gehiago ipinita.
Oregik azaldu zuenez, plataforma zabaltzea ezinbestekoa zen: “Plataforma zaharraren azalera ez zen nahikoa eta, gainera, maila bat baino gehiago zuen. Behin-behineko eraikuntza batzuk zeuden bertan eta portuko hegoaldeko kontradikearen alboan eraiki zen, ibaiertzeko moilarekiko perpendikularrean”.
