Errenteriako sortzaileak, Aitzol Gogorzarekin
Udazkenean hasi zen Errenteria-Oreretako sortzaile talde bat laguna duten Aitzol Gogorza gaixo dagoen presoari laguntzeko lanean. Horren emaitza disko bat izan da, Ihes puntua, eta horrekin batera, izen bereko ekitaldi bat prestatu dute hurrengo iganderako, hilak 9. Ipuinak, gutunak, bertsoak eta irudiak eskainiko dituzte. 19:00etan hasiko da Errenteria Hiria Kulturgunean. Herritar guztiak gonbidatu dituzte, eta kulturgunea betetzea dela helburua esan dute. Sarrera doan da, eta egunean bertan lortu ahal izango da kulturgunean.
30 lagunek parte hartu dute proiektu horretan, eta “Aitzolen alde eta bereziki Aitzolentzat poesia, bertso, ipuin kantu eta musikaz osatutako diskoa” prestatu dutela esan dute, euren “maitasuna eta elkartasuna” adierazteko. Izan ere, Gogorza larri gaixo dauden hamabost euskal presoetako bat da. Zehazki, nahasmen obsesibo konpultsiboa du aspalditik. Egun Basauriko espetxean dago, eta sortzaile taldeak bezala, jende askok eskatu du aske uzteko.
Hala ere, ekitaldia eta diskoa, oro har, muturreko egoeran dauden preso guztiei zuzenduta dagoela jakinarazi dute egileek, eta bereziki, Errenteria-Oreretako euskal preso politikoei.
Ekitaldiaren egunean bertan erosi ahal izango da diskoa, 7 euroan. Hogei piezez osatuta dago, eta honako artistek parte hartu dute: Iñigo Legorburu, Mikel Markez, Lander Garro, Kashbad, Oier Guillan, Juxe Goenaga, Iñigo Susperregi, Arrate Arozena, Joxemari Carrere, Korumba, Eider Rodriguez, Sorkun, Itziar Amenabar, Ainara Lasa, Jon Miner, Urtzi Ibarguren, Eneritz Gurrutxaga, Jose Luis Gurrutxaga eta Arkaitz Miner.
