Añarbera mendi martxa egingo dute igandean
Baso erreserba izendatu nahi duten Añarbeko eremua ezagutzeko mendi irteera antolatu dute iganderako. Añarbe eta Errekabeltz mendiak igoko dituzte. “Keinu horrekin erreserbaren sorrera azkartu eta pausoak orain emateko” eskatu nahi diote Gipuzkoako Foru Aldundiari eta Eusko Jaurlaritzari.
Egin nahi duten irteera baliatuz, baso erreserbaren egoeraren berri eman du antolakuntzak —talde ekologistak, mendi elkarteak eta instituzio sinatzaileak—, eta gogorarazi du bertako landaredi eta faunak interes maila altua duela, baita bertako hariztiak ere, Gipuzkoa eta Bizkaiko harizti handiena baita. Erreserba gune horrek, gainera, urtegia inguratu eta babestuko duela jakinarazi du. 2006an proposatu zuen Errenteriako Udalak baso erreserba izendatzeko.
Autobusak antolatu dituzte, gune horretara joateko. Errenteria-Oreretan Iztietako geltokitik aterako da, 09:00etan. Izena emateko 943 52 78 79 telefono zenbakira deitu beharko da astearte eta ostegunetan, 19:30etik 21:30era. Autobus horrek honako ibilbidea egingo du: Liztorreta, Susperregi, Malbazar, Untzuegaina eta Liztorreta.
