Europako Irrati Komunitarioen II. Foroa antolatu du Antxetak
Antxeta Irratiak Europako Irrati Komunitarioen II. Foroa antolatuko du asteazkenetik ostiralera, Hendaian eta Donostian. Hainbat gaiez eztabaidatuko dute, besteak beste, Irlandako hizkuntza politikaz, Hego Euskal Herriko irrati frekuentzia berriez edota emakumea eta komunikazioaz.
Etzi, asteazkenarekin, Irlandako hizkuntza egoera izango dute hizpide Donostiko Kutxa Andia aretoan (Andia kalea, z/g) Irlandako Hizkuntza Politika goiburuko hitzaldiarekin. 19:00etan hasiko da eta denentzat irekia da. Hizlariak, Dublingo Near Fm irratiko Ciaran Murray eta Belfasteko Failte Fm irratiko Fergus O’Hir kazetaria izango dira. Antxetako zuzendari Aitziber Zapirainek moderatzaile bezala jardungo du.
Ostiralean Irrati Komunitarioen Munduko Elkarteko (AMARC) presidente Mari Pia Matta izango da Donostian. Herri Maputxeak eta Adierazpen Askatasuna hitzaldian parte hartuko du, Elida Mingo antropologoa eta Gabriela Ines Llanguiano gazte maputxearekin batera. Asteazkeneko solasaldia bezala, ostiralekoa ere Donostiako Kutxa Andia aretoan izango da, 19:00etan, eta Aitor Errazkin kazetaria izango da aurkezpen lanak egingo dituena. Antxetako kazetaria da Errazkin ere, eta duela bi aste Montpellierren egindako batzarrean AMARCen Europako Kontseiluko kide izendatu zuten.
