Asteazkenean geratu zen aske. 197/2006 doktrina ezarri zioten, baina hori atzera bota zuen Auzitegi Nazionalak, aplikatu behar ez zitzaiola iritzita.
Josu Ziganda oreretarra, 24 urtean espetxean egon ostean, joan den asteazkenean geratu zen aske. 197/2006 doktrina ezarri zioten, baina atzera bota zuen Espainiako Auzitegi Nazionalak. Atzo egin zioten harrera bere auzoan, Gaztañon.
2019. urtea jarri zuten espetxetik ateratzeko data gisa doktrina ezarrita. Baina aurreratu egin zen kaleratzea. Doktrina jarri ziotenean helegitea jarri zuen Zigandak Auzitegi Nazionalean, eta Fernando Grande-Marlaska buru duen zigor salako osoko aretoak arrazoia eman zion. Epaiak dio Pello Etxeberria Leteren kasu berberean dagoela Ziganda, eta Etxeberria Leteri arrazoia eman ziola Auzitegi Konstituzionalak. Beraz, uste du ez zaiola 197/2006 doktrina aplikatu behar.
Erabaki horren aurka dago, ordea, Auzitegi Nazionaleko Fiskaltza, eta, horregatik, jakinarazi du helegitea jarriko duela Espainiako Auzitegi Gorenean. Fiskaltzak pentsatzen du
Parot doktrina ezarri behar zaiola Zigandari, eta espetxean egon behar lukeela 2019. urtera bitartean.
