Amagoia Elezkanoren erailketa matxista salatzeko elkarretaratzea egingo dute bihar
Amagoia Elezkano 26 urteko laudioarraren hilketa dela eta, Oarsoaldeko emakume taldeek zein talde feministek elkarretaratzea antolatu dute bihar arratsalderako Errenteria-Oreretako Niessen merkatalguneko sarreran. Elkarretaratzea Emakumeenganako indarkeria gehiago ez! lelopean egingo dute protesta ekitaldia, 19:30etik aurrera. Eskualdeko lau udalerrietako udaletako berdintasunerako arloek bat egin dute elkarretaratzearekin.
Gaur goizaldean, 05:30a inguruan, SOS Deiaken abisua jaso dute, Elezkanoren arrebak deituta. Etxebizitzara joan direnean, Amagoia Elezkanoren gorpua aurkitu dute, labana batek eragindako zauriekin. Bertan zegoen 49 urteko bikotekidea ere, eta ertzainek atxilotu dute, ustezko hiltzailea delakoan.
Oarsoaldeko emakume taldeek argi utzi nahi izan dutenez, “horrelakoak ezin dira gertatu gure gizartean”. Horregatik, indarkeria matxista borrokatzeko “konpromiso tinkoa” dutela berretsi dute, eta “maila bereko konpromisoa” eskatu diete erakundeei zein herritarrei. Azkenik, elkartasuna adierazi diete Elezkanoren familia eta lagunei.
