Epailea protagonista izan da Pasaiaren porrotean
Larunbat arratsaldean jokatu zuen Pasaiak denboraldiko azkeneko partida, Portugaleteren kontra. Hirugarren Mailari eustea lortuta, hasiera batean partida lasaia zirudiena asko okertu zen, epailea izan baitzen protagonista. Izan ere, hiru penalti adierazi zituen, eta etxeko hiru jokalari kaleratu zituen, bederatzi txartel hori ateratzeaz gain.
Zurigorriak aurreratu ziren markagailuan, hamargarren minutuan Ander Famosok lortutako gol bati esker. Pozak ez zuen asko iraun Don Boscon, Portugaletek 14. minutuan berdindu baitzuen. Atsedenaldira 1-3ko emaitzarekin iritsi ziren, eta ordurako epaileak hainbat erabaki eztabaidatsu hartuak zituen. Bizkaitarrek 54. eta 76. minutuetan sartu zituzten beste bi golak.
Pasaiak, Miguel Angelen bitartez, lortu zuen bigarren gola 85. minutuan, eta hortik aurrera hasi zen txartel gorrien festa. Josu Aranbururi bigarren txartel horia erakutsi zion, sarrera bat egiteagatik, eta bi minutu beranduago Asier Aranetari txartel gorria atera zion, beste sarrera batengatik. Jokaldi berean Igor Mera kaleratu zuen epaileak.
Pasaia hamabosgarren postuan geratu da sailkapenean, 43 punturekin. Portugaletek, berriz, garaipena lortuta, igoera jokatzeko fasea jokatzeko txartela lortu du.
