Brontzea Sagarzazurentzat nagusien Espainiako Judo Txapelketan
Iokin Sagarzazu hondarribiar judokak brontzezko domina lortu zuen -60 kiloetan asteburuan Alcobendasen (Madril) egin zen Helduen Mailako Espainiako Judo Txapelketan. Azpiko mailetan hainbat aldiz txapeldun izan eta gero, bigarren urtez jarraian nagusien podiora igo da hondarribiarra —iaz zilarra izan zen—. Aurten, baina, meritu handiko emaitza lortu du Sagarzazuk, ukondoan izandako lesio baten ondorioz hilabetez entrenatu gabe izan delako eta, hori dela-eta, ez delako Espainiako Txapelketara sasoi bete-betean iritsi.
Alcobendasen duen guztia eman behar izan zuen hondarribiar gazteak txapelketan aurrera egiteko. Lehen borrokan Lopez madrildarra garaitu zuen, ippon bidez, baina bigarrenean Kataluniako ordezkari Garciaren kontra galdu zuen, yuko-z, lehia estu baten ondoren, eta errepeska jokatu behar izan zuen. Baina errepeskako bi borroketan nagusi izan zen Sagarzazu, Aranda gaztelarraren eta Galiziako Riopedre judokak menderatuz.
Brontzezko domina lortzeko Justo Nuñez madrildarra menderatu behar zuen Terra i Mar taldekoak eta lortu zuen, wazari bikoitz batekin. Horrenbestez, nagusien mailako bigarren domina jantzi du Sagarzazuk, lesioen gainetik oso goi mailako kirolaria dela erakutsiz.
Ama Guadalupekoatik Valentziara
Ama Guadalupekoa Judo taldean hazi zen judoka bezala Sagarzazu eta 2009tik Valencia Terra i Mar klubean ari da. Goi mailako kirol entrenamenduak eta ikasketak behar bezala uztartzeko joan zen Valentziara bizitzera.
