Francesco Tonucci, Oarsoaldeko haurren konplizea
Donostian egin diren Herri hezitzailea, eskola herritarra jardunaldien barruan Francesco Tonucci psikopedagogo eta komikilari italiarrak hainbat ekarpen egin ditu. Aditua da Tonucci haurren beharretara egokitutako egitasmoak lantzen, baina berezitasun batekin, nabarmena gainera: haurrek erabakitzen dute, parte hartze prozesuen bidez, zer egin nahi duten. Hori da Tonucciren lanaren funtsa. Hala, joan den larunbatean bisita egin zuen Oarsoaldera italiarrak, eta Irrien Lagunak Oarsoaldean taldeko kideek harrera egin zioten Pasaian. Lehenik, San Pedrotik abiatuta, Pasaiako badia bisitatu zuen, eta ondoren, Donibanen egindako festan parte hartu zuen, besteak beste, Porrotx eta Brinko pailazoekin. Bertakoak dira irudiak.
Oarsoaldeko haurrak, ordea, ez ziren mugatu Tonucciren hitzak entzutera. Herri bakoitzeko Irrien Lagunen taldekoek zertan ari diren azaldu zioten, eta haurrentzako herriak nahi dituztela adierazi zioten, modu praktikoan gainera: lantzen ari diren egitasmoen berri eman zioten hitzez, marrazkiekin, eta ipuinekin. Arratsalde pasa bukatzeko sardina jatea egin zuten Donibaneko Santiago plazan.
