Superdibisioa bigarren tokian bukatu du Irungo Leka Eneak
Galduta ere, Gizonen Superdibisioko hirugarren postuan amaituta ere, historikoa litzateke, inoiz ez baita geratu Leka Enea hain goian, baina denboraldiko azken partida CER L’Escala taldeari irabazi (4-0) eta bigarren geratu dira irundarrak, markoan jartzeko moduko denboraldia burutuz.
Helburua Europan jokatzeko eskubidea duten sei lehenengoen artean geratzea zen, baina horrekin konformatu ez eta bigarren postuan bukatu dute, hainabat jardunaldietan lidergoan izan zirelarik.
Liga Cajasur Priegorentzat zela jakinik, ia beste guztia zegoen jokoan azken jardunaldian: jaitsierako postu bakarra —Guadix erretiratu baitzen—, Europan aritzeko azkena, eta ohorezko postuak, bigarrena tarteko. Horregatik, partida guztiak larunbatean eta ordu berean jokatu ziren, arratsaldeko seietan.
Leka Eneak bigarren geratzeko bere partida irabazi behar zuen, edo Arteal Santiagok baino puntu bat gutxiago lortu, baina ez bi. Irundarrek puntu bat gehiago zuten sailkapenean baina averagea galiziarren aldekoa zen. Leka Eneak ez zuen partido erraza, Europako postua jokoan zuen L’Escalari irabazi behar ziotelako. Baina gironarrei aukerarik ez zioten utzi eta lau partidak (Zhang Sining txinarrak bi eta bana Zoltan Batorfik eta Endika Diezek) irabazi zituzten, bigarren postua berretsiz eta katalanak Europatik kanpo utziz.
Europa eta jaitsiera
Europan jokatzeko balio duen seigarren postua Mataro Quadisentzat izan da. Bartzelonarrek ez zuten hutsik egin eta irundarren oparia gustura jaso zuten. Azken partidan lortu dute helburua, jardunaldia hasi aurretik L’Escalakoak zirelako seigarren tokian.
Eta jaitsierari dagokionez, Ceutak jokatuko du datorren urtean Ohorezko Mailan, liderrarekin etxean 1-4 galdu eta gero. Denboraldia Hispalisekin berdinduta bukatu dute, puntutan zein average-an, baina garaipenen koefizientea alde zuten Sevillakoek eta mailari eutsi diote, azken jardunaldian atseden izan duten arren.
Azken sailkapena
- Cajasur Priego. 36 puntu
- Leka Enea Irun. 33 puntu.
- Arteal Santiago. 31 puntu.
- San Sebastian de los Reyes. 29 puntu.
- DKV Borges Vall. 23 puntu
- Mataro Quadis. 19 puntu.
- CER L’Escala. 18 puntu.
- Caja de Burgos. 13 puntu.
- UCAM Cartagena. 10 puntu.
- Gabitec Ceuta. 4 puntu.
- CTM Hispalis. 4 puntu.
