Alkatea, gaur goizean, gobernu taldeko hainbat kiderekin
Bihar bilduko da lehen aldiz Amaia Agirregabiria Pasaiako alkatea Pasaiako Portu Agintaritzako presidente berri Ricardo Peñarekin. Horren harira, agerraldia egin du gaur alkateak gobernu taldeko hainbat kiderekin. Bi erakundeen arteko elkarlanaren, adostasunaren eta harreman onen alde egin du Agirregabiriak, baina hainbat lerro gorri ere zehaztu ditu. Edonola ere, udalerriaren eta portuaren arteko harremanak, aurrera begira, “beste mota batekoak izan daitezela” nahi du alkateak.
Peñak prentsan aurreratu du biharko bileran Kaiko Herrerarako “antolamendu egoki bat adostea” bilatuko duela alkatearekin, besteak beste. Horren aurrean, alkateak galdegin du “bakoitzak bere lan esparruak” errespeta ditzala, “udalak portuaren kudeaketaz bere iritzia badu ere, ez dio inoiz esango Agintaritzari nola egion behar duen bere lana”. Horregatik, Pasaiako Udalari dagozkion gaietan, hirigintzan kasu, “sar ez dadila” eskatu dio portuari, “herria eta bere lurrak ez dira merkatu bat, lur publikoaz ari gara. Horrekin ez da espekulatzen”.
Gai zehatzez ere mintzo da alkatea. Kaiko Herreratik zehar topora egin duten sarbide berriak ez dituela “udalak aurreikusitako baldintzak betetzen” berretsi du alkateak, eta hor inguruko pabilioia bota dezatela eskatu du. Eremu horretan ere, Kaiko Herreran, Ziriza eta Gomistegi daude: “Etorkizuneko antolamendua garatu bitartean, baliozkotu ditzagun lor horiek. Ez dute portu erabilerarik, itzul daitezela herrira”. Gainera, Zirizako eraikina, alkateordetza nahiz Trintxerpeko Azoka, edo Donibaneko eraikin balioanitza ere izan ditu hizpide alkateak, eta horiek herriari emateko eskatu du. Aldiz, Ondartxoko egitasmoa eredutzat jarri du alkateak, “jarrai dezagun bide beretik, oztopoak gaindituz, eta bakoitzak beretik emanez”, esan du.
San Pedroko lonja
Azken hilabeteetako gai gatazkatsuenetakoa San Pedroko arrantzaleen lonja berriarena da. Egiten ari dira azpiegitura berria, baina lizentziekin arazoak daude. Alkateak hori konpontzeko bideak jar daitezela nahi du, “oraindik garaiz gaude udalak aldundiarekin kontratatua duen dirua bertara joan dadin. Akordiorik lortu ezean, beste ekintza batzuetara bideratuko dugu diru hori”. Izan ere, aldundiak eta udalak hitzartuta duten diru hori lonjarako izateko, aurretik lizentzia eskatu beharko luke portuak, “baina portuak ez du horretarako ohiturarik izaten herri honetan, eta hitzarmenak dioena bete dezala eskatzen diogu. Gaia judizializatuta dugu. Edozein herritarrek obra bat egiten duenean, lizentzia bat eskatu behar du. Portuak ere hala egin behar du”. Aldundiaren diruarekin lonjaren gainaldea egin eta urbanizatuko litzateke.
