LABek greba orokorra girotu du ehunka herritarrekin
Oarso Bidasoko mobilizazioa egin dute gaur eguerdian Errenteria-Oreretan, LAB sindikatuak deituta. Langileen Eguna hilaren 30eako greba orokorraren deialdiarekin markatuta dator, hortaz, gaurko mobilizazioan M30eko greba egiteko erabakiaren lelo nagusiak aldarrikatu dituzte manifestazioan parte hartu duten ehunka herritarrek. Hala, murrizketen, banketxeen, prekarietatearen edo “langabeziaren arduradunen” kontrako oihuak botatzeaz gain, Euskal Herriko lan esparru propioa aldarrikatzekoak ere entzun dira, Hemen lan egin, hemen erabaki eta antzekoak. Horrez gain, gazteen lan egiteko aukeren defentsan ere izan dira aldarrikapenak.
Gamon Zumardian hasi da 12:00ak pasatxo bi eskualdeetako manifestazioa. Dantzari Txiki Eguna dela-eta hesiek inguratuta zegoen zumardia, baina hori ez da oztopo izan abiatzeko. Errenteria-Oreretatik bira eman ondoren, Xenpelar plazan bukatu da mobilizazioa; bertan, Oarsoaldeko eta Bidasoko preso politikoen senideak panelekin zituzten zain manifestariek. Bertan, ekitaldia izan da, Zorion Ortigosa LABeko Oarso Bidasoko arduradunaren eskutik, besteak beste.
Mobilizazioa 12:00ak inguruan hasi bada, lehenagotik ere izan dira Errenteria-Oreretako manifestazioarekin lotutako ekimenak. Hala, Ernai gazte mugimenduko kideek, martxa egin dute Irundik hasita, Oiartzundik pasa eta Errenteria-Oreretaraino. Irundik ere 11:00etan auto karabana bat atera da, Moskutik, Errenteria-Oreretako manifestaziora.
