Finala jokatu zuten pilotariak Oiartzungo Udaleko, Giriziako, Pilota Federazioko ordezkariekin eta Josetxo Gamioren senideekin
Joan den larunbatean Euskal Herriko Josetxo Gamio XXX. Pala Txapelketako finalak jokatu zituzten Madalensoro pilotalekuan. Bost final jokatu zituzten, emakumezkoenak bi eta gizonezkoenak hiru. Giriziako pilota sailetik adierazi dutenez, “partidak ikusgarriak atera ziren, guztiak nahiko orekatuak eta joko onekoak izan zirelako”.
Emakumezkoen Gazte Mailan, Gabirondo-Eizmendi (Altzo) eta Senperena-Murua (Aia) bikoteak aritu ziren eta altzotarrak izan ziren nagusi, 25-16 irabazi zieten aiarrei. Dena den, partidaren erdira iritsi arte oreka egon zen.
Emakumezkoen Helduen Mailan, Eneritz-Ariane (Su-berri taldea) eta Arrate-Estitxu (Hernani) bikoteek jokatu zuten eta kasu honetan hernaniarrak gailendu ziren 10-25. Hernaniarrak hobeto moldatu ziren pilota biziarekin. Gainera, azken orduko lesio bat egon zen eta Naroak ezin izan zuen jokatu. Hori horrela, haren ordez Estitxu zumaiarrak jokatu zuen.
Gizonezkoetan, hirugarren mailan, Pagoaga aita-semeak faboritoak izan arren, Bikutze-Mileka bikoteak irabaztea lortu zuten, 25-22, “batik bat Mikela zestoarrak egindako txingurri lanagatik”. Ia partida osoan ez zuen pilota galdu eta horrek Pagoaga gazteari urduritasuna sortarazi zion.
Bigarren mailan, Ramos-Zubimendi (Hernani) eta Loidi-Urdanpileta bikoteek jokatu zuten. Hernaniarrak atera ziren garaile, “batik bat Ramos aurrelariaren joko indartsuagatik”. 22-17 irabazi zuten. Pilota gogora astindu zuen Ramosek eta Zubimendi atzelariaren laguntzarekin txapela irabaztea lortu zuten.
Lehenengo mailako finala ikusteko ikusmin handia sortu zen. Antxordoki-Telletxea (Igantzi) eta Rodriguez (Lesaka)-Huegun (Donostia) bikoteak aritu ziren. Antxordoki-Telletxea bikotea azken urteetako txapeldunak izan dira, baina bigarren sorpresa eman zen eta Rodriguez-Huegun bikoteak irabaztea lortu zuen, 25-17. “Partida orekatua izateaz gain, maila onekoa izan zen eta hasieran galtzaileek aurretik ibili arren, erdi aldera, tanteoan aurretik jarri eta bukaera bitartean eutsi egin zioten, batik bat pilota biziaz baliatuz.
Partidak bukatuta, sariak banatu zituzten, bertan izan ziren Oiartzungo Udaleko, Giriziako eta Pilota Federazioko ordezkariak. Josetxo Gamio zenaren senideek banatu zituzten sariak. Antolatzaileek eskerrak eman dizkie guztiei.
