Beheko maila guztietan Munduko Txapelduna izan da
Ion Areitio txirrindulariak (1992, Hondarribia) laugarren postua lortu zuen asteburuan Heubach-en (Alemania) egin zen 2013ko Munduko Trial UCI Kopako lehen proban. 20 hatzbeteko (pulgada) modalitateko Elite Mailan lehiatzen da hondarribiarra —beste bat dago, 26″-koa— eta hirugarren postutik puntu bakarrera geratu zen; 54 puntu egin zituen Areitiok eta 53 Dani Comas katalanak. Benito Ros iruñearrak irabazi zuen proba, 48 punturekin, iazko sailkapen orokorreko txapeldun Abel Mustieles espainiarraren aurretik (49,5 puntu).
Beheko maila guztien Munduko txapelketa irabazitakoa da. Hogei urte baino ez ditu hondarribiarrak eta bigarren urtea du nagusien artean. Iaz bosgarren geratu zen Munduko Kopan eta aurten iazkoa hobetzea du helburu.
2013ko Munduko Trialsin UCI Kopako lehen proba egin zen asteburuan Alemanian. Zer moduz moldatu zinen?
Negua nahiko gogorra izan da entrenamendu eta prestakuntza fisikoaren aldetik. Aurreko urtean lehenengo bosten artean bukatu nuen Munduko Kopa eta aurten horrela bukatzea espero nuen. Eta laugarren gelditu naiz, hirugarrenetik puntu batera. Proba nola izan den ikusita ez dira emaitza oso adierazgarriak, lokatza eta kanpoko faktoreengatik, baina oso kontent.
Esan dutenez txapelketa lehorrerako prestatuta zegoen baina ez zen bustirako egokia. Zu nola moldatu zinen.
Kanpoko jendea asko kexatu da eta haserre daudela ematen du. Gu hemen, Gipuzkoa eta Euskadiko txapelketetan askotan izan dugu lokatza, euria… Aurten Gipuzkoako Txapelketan lau proba izan dira eta horietatik hirutan eguraldi txarra egin digu. Ni behintzat nahiko ohituta nago. Baina ikusten da jendeari ez zaiola gustatu eta kriston zalaparta sortu da horren inguruan.
Zuk zeuk zenbat fiasco -oztopoa ezin gainditzeagatik 5 zigor puntu— egin zenituen?
Finaletan oztopo zailenak jartzen dituzte eta bi zona eta hiru buelta izaten dira eta buelta bakoitzeko hiru bat
fiasco egiten ditut normalean, maila oso handia delako. Eta Alemaniako probako finalean lehen bueltan bi egin nituen eta bigarren bueltan denak. Lehen bueltan lehenengoak 23 hanka egin zituen eta nik 24 eta bigarrenerako dena okerrago jarri zen eta ez nuen zona bat bera ere bukatu.
Lehen proban laugarren izan zinen. Zein da zure helburua sailkapen orokorrera begira?
Bost proba dira. Hurrengoa Polonian, bi Alpeetan, horiek baino lehenago Europako Txapelketa Suitzan, eta Munduko Kopako azken proba Flandrian. Alemanian ez da superfinalik egin, finaleko lehen laurak ez gara aparte lehiatu. Iaz beti atarian geratu nintzen, bosgarren, eta aurten superfinaletan sartzea dut helburu, ahalik eta proba gehienetan lehen lauren artean geratzea.
Ez dago gaizki kontuan izanik bigarren urtea duzula nagusiekin…
Nahiko ondo. 2011n Elite Mailan nintzen ja, baina Munduko Txapelketan txorkatila puskatu nuen eta ezin izan nintzen Munduko Kopan lehiatu. Iaz izan zen lehen urtean ondo lehiatu ahal izan nuena.
Lehen lauren artean Euskal Herriko bi pilotu, katalan bat eta beste bat ondokoa Aragoikoa. Maila badago, zergatik ez dira maila goreneko probak gertuago egiten?
Dirutza behar da antolakuntza aldetik, UCIko epaileak ordaintzeko, materiala… Proba gehienak Alemania, Frantzia eta Belgika inguruan egiten dira, ez dakit babes gehiago dutelako edo zergatik, baina horrela da.
Zeintzuk dira Munduko Kopa eta Munduko Txapelketa irabazteko faboritoak?
Alemanian nire aurretik geratu diren hirurak. Benito Ros aurrena —11 aldiz irabazi du nafarrak Munduko Txapelketa eta lau aldiz Munduko Kopa—. Nik uste Benito eta Abel [Mustieles, aragoarrra] direla faborito eta Dani Comasek agian maila pixka bat baxuago izan dezake, baina hirurak dira faborito.
Aurten ere izango da Munduko Txapelketa?
Bai, urtero dago. Hegoafrikan izango da, baina dirurik ez dago. Aurten Munduko Koparako dirurik ez dugu jaso eta orain arte ziklokroseko Espainiako selekziorik ez da egon eta jaitsierakoa ere ez, eta nik uste trialekoa are eta gutxiago. Espainiako ateratzen ez bada saiatu nahi dugu Euskadikoa ordezkatzen joan edo horrelako zeozer…
Eta dirua behar duzue horretarako.
Bai, noski —barre egiten du—. Bidaia hemendik hara nahiko garestia da, baina gauzak oraindik airean daude, Espainiako selekzioak ez duelako ezer atera oraindik. Ikusiko dugu.
Europakoa bai izango zara seguru?
Bai, Suitza da, Munduko Kopako Poloniako probaren bueltan. Han izango naiz.
Denboraldi luzea da zuena. Noiz izaten duzu sasoi punturik altuena?
Hasiera batean lehenengo Munduko Kopetan nahi berde iristen zara eta ni puntu gorenean Munduko Txapelketan izaten naiz. Aurreko urtean Munduko Kopako probetan gaizki hasi nintzen, zortzigarren, zazpigarren, gero hobeto bosgarren, uste dut laugarren egin nuela beste bat eta Munduko Txapelketan puntu gorenean iritsi nintzen.
Eta laugarren izan zinen.
Bai. Finalerdiak gaizki egin nituen eta justu-justu pasatu nintzen, nerbioengatik eta finalera sartzeko duzun presioagatik. Behin finalean lasaitu nintzen eta nahiko ondo ibili nintzen.
Lehenengo urtea zen zuretzat eta Benito Ros nafarrak hamaikagarren txapelketa lortu zuen. Nola da bapatean horrelako jendearen kontra antzerako mailan lehiean egotea. Zu zara aurrekoen arteko gazteena…
Bai, Mustielesek nik baino urtebete gehiago dauka eta Dani [Comas] Benitoren adinekoa da. Hirurak ezagunak ditut eta Benitorekin askotan entrenatzen dut. Urtean ordu asko pasatzen ditut berarekin eta oso lotura hestua daukat. Mustialesekin ere aurreko ekipoan elkarrekin egon nintzen. Hiruen artean oso ondo moldatzen gara.
Zertan zara beraiek baino hobea eta zertan hobetu behar.
Bakoitzak bere puntu fuertea du, baina Benitok eta Abelek [Mustieles] dena dute ona. Nik oreka dut ona eta lekuan joan behar denean lekuan ondo joatea, hori ere badut. Eta txarra… ba oraindik tiroi pixka bat gelditzen zaidala.
Eta hori nola lortzen da?
Hori, entrenatuz eta entrenatuz egiten da.
Hiru urterekin hasi zen ibiltzen Areitio, eta seiekin lehiatzen
Konpetitzen sei urterekin hasi nintzen, baina txirringan ibiltzen hirurekin. Ezin nintzen espaloitik edo leku normaletik joan, beti txoruarena egiten joan behar nintzen. Aita trialeko motoarekin ibiltzen zen eta horrela hasi ginen txoro-txoro. Hasieran bakarra nintzen, lagun batekin hasi nintzen eta bakarrak ginen. Aitak asko laguntzen zidan eta, beti baserrian bizi izan naizenez, han ez zen falta ez bizkletarik ez motorik.
Motorra ere gustatzen zaizu, baina ez konpetitzeko.
Trialeko motorra gustatzen zait baina konpetitzeko ez. Aurten enduroko motorra probatzen hasi naiz eta afizionatuen txapelketa batzuetan parte hartu dut. Ondo pasatzeko egiten dut.
Ikasten ari zara?
Bai, Gasteizen nago, IVEF-en (Soin Hezkuntzako Euskal Erakundea). Hiru urte egin ditut eta oraindik urte bat falta zait.
Entrenatzeko denbora lortzen al duzu?
Nahiko ondo moldatzen naiz klaseak aldatzeko malgutasuna ematen didatelako. Normalean astelehenetan joaten naiz eta gero entrenatzeko etxera bueltatzen naiz. Joan eta etorri egiten dut.
Noizbehin arazorik izan al duzu kirola eta ikasketak uztartzeko?
Batxillera bukatu eta ondoren hasi naiz Munduko Kopan. Lehenago Espainiako Txapelketetan eta horrela ibiltzen nintzen eta ez ziren oso urruti izaten. Orain dela urte pare bat edo hiru hasi naiz urrutirago joaten eta ikasketekin nahiko ondo moldatzen naiz.
Krisiarekin ez da erraza izango babesleak lortzea, eta gutxiago bekak, ez delako kirol olinpikoa. Aukerarik al da trialsin kirola lanbide bilakatzeko?
Posible, posible da. Hamabost bat pertsona izango dira horretaz bizi direnak, baina praktikatzen duzun bitartean biziko dira. Edozein lesio, edozein arazo duzula, ahaztu egiten zara. Ikasketak bukatu badituzu eta urtebete probatu nahi baduzu profesional bezala ba probatzen duzu, baina bestela, beste kiroletan, futbolean bezala, jokatu eta horretaz bizi, hori ez.
Lesio handirik gabe, noiz arte praktikatu daiteke trialsina goi maila?
Orain arte hogeita hamar urtetan muga zegoela uste genuen, baina hor daude Benito eta Dani, 32 urterekin. Luzatzen ari da.
Eta zuk. Zer lortuta esango zenuke ‘kitto, gehiago ezin dut lortu eta erretiratu naiteke’?
Orain arte beheko maila guztietan Munduko Txapelketa irabazi dut. Elite Mailan txapelketa irabaztea bizikleta txikiarekin eta 26 hatzbetekoa kategorian ere… 2010. urteko gazte mailako txapelketa bi bizikletekin irabazi nuen, eta iruditzen zait Elite Mailan bi horietan irabaziz gero, seguro nahikoa izango dela.
Zeinekin ibiltzen zara hobeto, 20koarekin edo handiarekin.
Betidanik txikiarekin ibili izan naiz, oso ondo moldatzen naiz eta gustukoena hori dut. Baina 2010eko txapelketarako hiru entrenamendu egin nituen etxean handiarekin eta joan nintzen ateratzen zena egitera. Ikusi nuen handiarekin ondo moldatzen nintzela baina nire kuttuna txikia da, 20koa.
