Irungo zenbait bide azpiegitura bidean dira, Santanoren arabera
Atzo elkartu ziren Jose Antonio Santano alkatea eta Joseba Altube Gipuzkoako Foru Aldundiko Bide Azpiegituren zuzendaria, Irunen egitekoak diren zenbait lanei buruz hitz egiteko. Hala, Bidasoaldeko Ospitalearen parean eraikitzekoak diren biribilgunea eta Dunboa inguruan nahiz Oinaurren pantaila akustikoak jartzearen inguruan hitz egin zuten bi aldeek. Santanoren esanetan, “albiste onak” eman dizkie aldundiak, egun zenbait puntutan sortzen diren arazoentzako irtenbideak martxan jartzear daudelako.
Lan horiek hiriarentzat “lehentasun” direla iritzi dio alkateak. N1 errepidea bikoizteko falta den zati bakarra Irun dela gogorarazi du, “horrek irteera eta sarreran sor ditzakeen arazoekin”.
Biribilguneari dagokionez, lanak aurten hastea espero duela esan du. Santanoren arabera, lau besotako biribilgunea izango litzateke, eta gaur egun dagoen N-638tik GI-363 errepiderako “sarbide arriskutsuaren tokian” jarriko litzateke.
Era berean, GI 363 errepidearen alde banatan autobus geltoki bat jarriko dutela azaldu du, baita pasabide bat ere “GI-363ren eta bizikletentzako bidearen gurutzagunea konponduko lukeena”. Lan hori udarako esleituta egon daitekeela gaineratu du.
Pantaila akustikoen gainean datozen asteetan lanak esleituko dituztela jakinarazi du Santanok. Asmoa 215 metroko luzerako pantailak jartzea da Osinbiribilgo biribilgunetik Dunboa ikastetxeraino.
