Don Bosco eta Langaitzeko irakasleak protestara irten dira
http://www.youtube.com/watch?v=klrvp3Uq74Q&feature=youtu.be
Murrizketen eta Espainiako Gobernuak proposatu duen LOMCE legearen (Hezkuntza Kalitatea Hobetzeko Lege Organikoa) kontra protesta egin dute gaur goizean Don Bosco eta Langaitz ikastetxetako irakasleek. Ikastetxeko ataritik atera, eta aldapan behera jaitsi dira. Pasaia eta Errenteria-Orereta lotzen dituen biribilgunera jo dute gero, eta handik buelta berriz ere.
Haritz Baztarrika Don Boscoko irakasleak azaldu duenez, Espainiako Konstituzionalean dago, hala nola, eskola orduen igoera eta ikasle kopurua 25-30era igotzea arautzen duen dekretua. “Arriskuan” daudela esan du Baztarrikak, “irakasleak gutxitzea ekarriko duelako”.
Bestetik, LOMCE edo Wert legearen kontra atera direla esan du, Espainiako Gobernuak irakaskuntza “zentralizatu” nahi duela salatzeko. “Erabakitzeko daukagun tarte txiki hori ere kendu nahi digute”, azaldu du irakasleak. Horrez gain, hizkuntzaren arloan, “gaztelania indartu” nahi duela esan du, “euskararen kontra”.
Don Bosco eta Langaitzeko irakasleek bi astean behin egiten ari dira protestak, eta horrela jarraitzeko asmoa daukatela berretsi dute.
