Beloaga, herri konkistaren bidean
Beloagako gazteluaren aztarnak
Beloagako gazteluari “merezi duen balioa” emateko, Oiartzungo Udalak kontsolidazio proiektua eskatu dio Aranzadiri. Beloaga ezagutzeko, bestalde, ibilbide bat prestatu du herriko talde batek eta Andrearriagako hilarriaren kopia jarri dute.
Konkistatua izan zen, indarrez. Orain berriz ere konkistatua izango da, maitasunez. Beloagako gazteluari “merezi duen balioa” eman nahi dio Oiartzungo Udalak, eta nola ez indusketa lanak bultzatu dituzten Oiartzungo Nafarroa Bizirik taldeko kideek. Herri konkistaren bidean jarri dira guztiak. Balio hori modu askotara eman daiteke eta horietako bat errekuperazioarena da. Udala “gazteluaren aztarnen egoerarekin kezkatuta”, Aranzadi Zientzia Elkarteari kontsolidazio eta irisgarritasun proiektua eskatu dio eta horretan buru-belarri Anartz Ormaza arkitektoa dabil. Helburua argia da: gazteluaren hondamena geratzea eta bertara joateko bidea erraztea. Proiektua fase desberdinetan egingo dela azaldu du Ormazak: “Iaz indusketa arkeologiko txiki bat egin zuten hainbat puntutan, aztarnen egoera zein zen jakiteko. Nahiko material atera zuten indusketa hartatik. Kontsolidazio fasean dauden hormak kontsolidatu egingo dira, karezko mortero batekin. Pitzadura batzuk badaude eta horma batzuk ez daude egonkor… Behintzat dagoena egonkortu beharra dago”. Hori lehenengo fasean. “Hurrengo fasean, zati batzuen hormak altxatu beharko lirateke, guztiek kota bera izan dezaten. Eta azken fasean irisgarri egin behar dugu, eskailera batzuekin eta”. Esku-hartzeak, baina, aztarnei ez diela kalterik egingo nabarmendu du: “Ez da aztarnak hipotekatzen dituen esku-hartze bat izango”. Proiektua Gipuzkoako Foru Aldundiak ezartzen dituen irizpideak jarraituta egin behar dute. “Aldundiak proiektua gainbegiratu egiten du, azken batean aztarnen eta esku-hartzeen arteko oreka bermatzen dela jakiteko. Aldundia oreka mantentzearen aldekoa da, dagoena mantentzearen aldekoa, alegia, eta ez erreproduzitzearena”, azaldu du Anartz Ormazak. Oiartzuarrek sustatutako proiektua Proiektua laster izango dutela pentsatzen du Ormazak. Behin bukatuta, udalaren esku jarriko dute eta berak erabaki beharko du lanak nola egingo diren, zein fasetan… diruak ere izango du horretan guztian eragina. Lanaren zati handi bat, baina, auzolanaren bidez egingo dela pentsatzen du Aranzadiko arkitektoak: “Oiartzungo talde batek sustatutako proiektu bat da, lan asko egin dute. Indusketaren zati handi bat ere auzolanean egin zuten. Proiektuaren filosofia ildo horretatik jarraituko duela uste dut”.
Beloagako gaztelua horrela izan zitekeela pentsatzen dute
