Euskaraz lan egiteko prest dauden merkatarien konpromiso bila, Pasaian
Pasaiako Udalak eta Laurak Bat Merkatari, Ostalari eta Zerbitzu elkarteak elkarlanean, euskaraz lan egiteko prest dauden komertzioen konpromisoa biltzeko ekimena abian jarri dute. Hala, establezimendu euskaldunak identifikatzeko Prest! Euskaraz bizitzeko, eskatu euskaraz eranskailua emango dute, baina eranskailutik harago doan ekimena da: merkatariak konpromisoa hartu behar du hala nahi duten bezeroak euskaraz artatzeko, eta hori idatziz jasoko du udalak. Hortaz, eranskailua duten dendetan euskaraz erosketa egiteko aitzakiarik ez dute izango aurrerantzean pasaitarrek. Merkataritza lan-mahaian hartutako erabakia da.
Egitasmo askoz zabalago baten barruko ekimena da atzo Trintxerpeko alkateordetzan Laurak Baten eta udaleko ordezkariek aurkeztu zutena. Herriko hainbat norbanakok era eragilek, udalarekin batera, 10 urterako Euskararen Plan Estrategikoa osatu zuten iaz, eta plan horren eginkizunen artean dago euskararen erabilera indartu eta hor eragiteko proposamenak eta neurriak ezartzea. Eta horren araberako egitasmoa da merkatarien konpromisoarena.
Eranskailuak izango duen leloak, ordea, berez duen mezuaz gain, badu izateko funtsa. Izan ere, Donibaneko Prest! euskararen taldeak sortutako Prest! Euskaraz bizitzeko lelotik abiatuta osatu dute. 2013an zehar erabiliko da mezu hori.
Komunikazioa
Kanpainaren berri emateko, eta konpromiso bila joateko, Udaleko Euskara Zerbitzuak dituen datuetan oinarritu dira, eta asmoa da euskaraz artatu dezaketen establezimenduetara gutunak bidaltzea hasteko, eta apirilean nahiz maiatzean zehar udaleko teknikaria nahiz Laurak Baten ordezkari bat establezimendu horietatik pasatuko dira, informazio gehiago emateko eta merkatarien konpromisoaren bila. Denda edo ostalaritza guneren bateko arduradunek ez balute bisitarik edo eskutitzik jaso, eta euskararen erabileran alde egin nahi balute, Pasaiako Udaleko Euskara Zerbitzura do Laurak Batera jo beharko dute.
