Etxez etxeko laguntza zerbitzuan "irregulartasunak" salatu ditu Bilduk
Hondarribiko udal gobernua “etxez etxeko laguntza zerbitzua irregulartasunez kudeatzen ari dela” salatu du Bilduren Udal Taldeak, komunikabideei bidalitako oharrean. Bertan diote, udalak enpresa kudeatzailearekin zuen kontratua 2009ko martxoaren 21ean bukatzen zela eta “alkateak esleipen berria egin arte luzatzea” erabaki zela, “legez kanpo, udal kontu-hartzailearen txostenak dioen bezala”.
Bilduren esanetan, “haien eraginez” alkateak lehiaketarako deia 2013ko otsailaren 28an egin zuen, baina ez zen inor aukeztu. Koalizioak uste du egoera erregularizatzeko unea iritsi dela, “kontuan izanda lau urte pasatu direla luzapena legez kanpo egin zenetik, eta etxez etxeko laguntzaren onuradunek independentzia murriztua duten pertsonak direla”.
Bilduk emandako datuen arabera, herrian 74 etxebizitzetan eskaintzen da zerbitzua etxez etxeko laguntza zerbitzua. Zerbitzuaren xedea da pertsona horiek “isolatuak egon daitezen edo haien borondatearen kontra zentroetan sartzea ekiditea, gizarte laguntzaileek horren beharra ikusten ez badute, behintzat”.
