Hurrengo asteburuan play-offetarako sailkatu daiteke Bidasoa-Irun
Bigarren itzulia ikusita edozer zen posible, baina gutxik uste zuten Bidasoa-Irun Angel Ximenez-Puente Genil taldearen kantxan irabazteko gai izango zenik, 2012-2013 denboraldian beste inork ez baitzuen hori lortu. Baina irundarrek bai, 27-29 irabazi zuten larunbatean Kordoban eta igoera kanporaketan sartzeko urrats bakarrera geratu dira. Liga erregularra amaitzeko sei punturen faltan bost ateratzen dizkiote play-off-etatik kanpo dagoen lehenengoari.
Puente Genileko Udal Kiroldegian jokatutako partida parekatua izan zen. Bidasoa indartsu kantxaratu zen eta aurretik jarri zen, lau goleko errenta lortu arte (8-12), baina etxekoek buelta eman zioten markagailuari eta atsedenaldian gol bategatik nagusi ziren (17-16).
Bigarren zatian ere bi taldeek jardun zuten nor baino nor. Hamar minuturen faltan Puente Genilek agintzen zuen (24-23), baina Bidasoak hobeto amaitu zuen partida, gogor defentsan, sendo atean eta oso azkar kontraerasoan. Bidasotarren artean Renaud bikain aritu zen erasoan, zazpi golekin; Crowleyk sei egin zituen eta Aranburuk eta Alvarezek, bosna.
Bost puntuko aldea, seiren faltan
Bigarren itzulian bidasotarrek daramaten martxa bikaina da eta sailkapenean beraiek baino hobeto dauden taldeen kontrako garaipenei esker dago taldea dagoen egoeran. Puente Genilen lortutako garaipenari esker Bidasoa bosgarren postuari eutsi dio. Laugarrenak eta seigarrenak ere, Alcobendasek eta Teucrok, euren partidak irabazi zituzten eta ezer ere ez da aldatu postu horietan.
Ordea, Adelma Sinfinen porrotari esker irundarrek oraindik eta gertuago dute play-off-a. Zazpigarren tokian zeuden Santanderrekoak lau puntura zeuden, eta orain seira. Torrelavegak aurrea hartu die, hemezortzi punturekin, hau da, Irungo taldetik bost puntura, jokatzeko sei geratzen direnean.
Hurrengo partida kanpoan jokatuko dute irundarrek, Teucroren kantxan. Larunbatean izango da, 20:00etan. Pontevedrakoak Bidasoak baino puntu bat bat gutxiagorekin daude sailkapenean. Irabazita, edo Torrelavegaren emaitza bera lortuta, irundarrek igoera kanporaketa jokatuko dute.
