Fiare bazkide berriak bilatzen ari da
Fiare Oarso taldeak banku etikoaren proiekturako bazkideak bilatzeko informazio puntua jarriko du Merkatuzar eraikineko sarreran. Asteazkenetik uztailaren 10era arte egongo da martxan, honako ordutegi honetan: 19:30etik 21:00etara. Fiare Oarsoko kideek “beharrezko informazioa eta laguntza emateaz gain, bazkide egiteko modua, diru deposituak egiteko aukera eta Fiareren funtzionatzeko modua” azalduko dute.
Duela bi urte sortu zen Fiare Oarso taldea, eta orduz geroztik banka etikoa zer den eta zehazki, Fiare proiektu kooperatiboaren berri ematen aritu dela jakinarazi du. Aurrera eraman dituen ekintzen artean, hitzarmena sinatu zuen iaz Errenteriako Udalarekin, azken hori Fiareren bazkide egiteko.
Bazkide egiteko interesa duenak informazio gehiago jasotzeko taldearekin jar daiteke harremanetan fiareoarso[a bildua]gmail.com helbidean edo www.proyectofiare.com webgunea bisitatuta.
