John Berkhout Oiartzungo taldeak lehen kontzertua ekainean emango du
Ekainaren 7an, Intxaurrondoko Kultur Etxean. Orduan emango du John Berkhout Oiartzungo taldeak bere lehen kontzertua. Egun horretan aurkeztuko du izen bereko diskoa ere.
Bost kidek osatzen dute John Berkhout: Ekain Perezek (ahotsa eta gitarra); Eneko Lusar-ek (gitarra); Mikel Alonsok (baxua); Ander Lizasok (teklatuak, klarinetea eta saxoa) eta Iñigo Goñik (bateria eta perkusioa).
2002an sortu zuten taldea. Ordutik hainbat taldetan eta musika estilotan mugitu dira partaideak: Gamora, Instep… Orain, “abentura berri batean” murgildu dira. Honela definitzen dute: “John Berkhout natura, nostalgia eta zentzumenak uztartuz, folk, rock, psikodelia edo indie musikaren ildotik eginiko bidaia bat dela esan dezakegu”.
Diskoa iazko udan grabatu zuten: “Urte askotako lanaren isla da. Taldeak eszenatokietatik urruntzea erabaki zuen, bide eta esperientzia musikal berrien bila abiatuz. Besteak beste, The Path edo Lost In The Wild abestietako paisaia eta paraje ezberdinetan, taldearen estilo intimo eta pertsonala hedatzen da, eta emozioz beteriko atal epikoek ere bere tokia dute”.
Etapa berriaren aurrerapen txiki bat ezagutarazi dute (lehen bideoklipa ere grabatuta dute):
Aurrerago emango dute informazio gehiago.
