Eskola Feminista egingo dute Errenteria-Oreretan
Garaipen elkarteak emakumeei zuzendutako Eskola Feminista antolatu du Errenteria-Oreretan. Bost ikastaro eskainiko ditu, eta lehenengoa autodefentsa tailerra izango da: larunbatean hasiko da, eta Wing-Tsun sisteman oinarritutako teknikak ikasiko dituzte partaideek. Horren bidez, ikasleek euren buruarekin seguru sentitzen, eraso sexistei aurre egiten, gorputzaren kontrola eskuratzen eta barruko indarrarekin konektatzen ikasiko dute, elkarteak azaldu duenez. Lide Marcok emango du ikastaroa, eta larunbatetan izango da, hilaren 20ra arte, 10:30etik 12:30era. Ekainean berriro errepikatuko dute.
Elkarteak bi zatitan banatu ditu ikastaroak: Agenda Sozipolitiko Kulturanitza eta Gorputzaren Agenda. Autodefentsa tailerra, hain zuzen, azken horren barruan dago, eta baita Gorputzaren eta emozioen zainketa izeneko tailerra ere. Hori gorputza sentitu eta ideiak argitzera zuzenduta dagoela jakinarazi du elkarteak, eta Maider Andonegi izango da formatzailea.
Soziopolitikaren arloan, hiru ikastaro prestatu dituzte: Formazio Feminista. I. urratsa, Simone de Beauvoirri buruzko mintegia, eta Bizitzaren ekonomia edo krisi ekonomiko neoliberalari nola aurre egin. Lehenengoak bizitzaren hainbat alorretan emakumeen kontrako desberdintasun, bazterkeria eta indarkeriaren oinarriak azalduko ditu; bigarrenak Simone de Beauvoirren bizitza eta lanaren berri emateaz gain, Bigarren sexua liburuak feminismoan izan duen eragina aztertuko du. Hirugarrenak, azkenik, Euskal Herriko krisi ekonomikoa oinarrian hartuta, hegoaldean eta iparraldean mugimendu feministek neoliberalismoari aurre egiteko dituzten estrategiak jakinaraziko ditu. Azken hori Oreretako Bilgune Feministarekin batera antolatu du.
Ikastaroak Alkartetxean egingo dituzte (Erdiko Kalea, 1), dohainik dira, eta emakumeei bakarrik daude zuzenduak. Aurretik izena eman behar da garaipeneskola[a bildua]yahoo.es helbidean edo 943 00 46 53, 685 75 90 91 edo 660 79 00 88 telefono zenbakira deituta. Ikastaroek iraun bitartean haurtzaindegi zerbitzua izango dela jakinarazi du Garaipen elkarteak. Horretarako, hiru egun lehenago abisatu beharko da.
IKASTAROAK
Autodefentsa feminista
- Apirilaren 6tik 20ra, eta ekainaren 1etik 8ra (larunbatetan), 10:30etik 12:30era.
- Formatzailea: Lide Marco.
- Ekainaren 29ean eta uztailak 2an (larunbata), 10:30etik 13:30era.
- Irailaren 18 eta urriaren 2, 16 eta 30ean; azaroaren 13tik 27ra eta abenduaren 4tik 18ra 18:30etik 20:00etara.
- Formatzailea: Maider Andonegi.
- Apirilaren 13ean, 10:00etatik 14:00etara eta 16:00etatik 19:00etara.
- Formatzailea: Ana Murcia.
- Maiatzaren 7tik ekainaren 25era (asteartetan), 18:00etatik 20:00etara.
- Formatzailea: Beatriz Zalakain.
- Irailak 28, urriak 26, azaroak 23, abenduak 14, urtarrilak 25 eta otsailaren 22an (larunbata), 11:00etatik 14:00etara.
- Formatzailea: June Gonzalez.
