Jaizkibelgo leherketak salatu ditu Ekologistak Martxanek
Joan den astean Guardia Zibilak ETAri atzemandako lehergaiak eztandarazi zituen Jaizkibelgo eremu militarrean. Horren aurrean Ekologistak Martxan taldeak esan du “suminduta eta etsita” dagoela, eta gogor salatu ditu leherketa horiek, “Jaizkibelgo eremu militarra behin betiko ken dezatela eskatzen diegu erakundeei”.
Hala, Jaizkibel babestutako eremua dela esateaz gain, erakundeen “kontrol eza eta konpromiso gabezia” dagoela esan dute ekologistek, “ingurumenaren babesean azaldu duten arduragabekeriagatik”. Hartara, azken urteetan Jaizkibelek “eraso asko” izan dituela jakinarazi dute, “baina leherketa horiek marra guztiak gainditu dituzte, imajina daitekeen guztia gainditu dute”. Horregatik, ekintza horrek Europako Batzordean salaketa merezi duela jakinarazi dute, eta euskal erakundeentzat “lotsagarriak” direla iritzi diote, “ez direlako gai denena den eta zaindu behar dugun eremu natural bat babesteko”.
