Bi lagun atxilotu dituzte gizon bat bahitzea egotzita
Ertzaintzak gizon bat eta emakume bat atxilotu zuten herenegun gizon bat erasotu eta bahitzea egotzita, Segurtasun Sailak jakinarazi duenez. Ertzaintzak larunbatean pertsona baten telefono deia jaso zuela jakinarazi du, esanez, gizon bat erasotzen ari zirela Sorgintxulo kalean.
Ertzaintzaren patruila bat joan zen, eta ustez biktimak aurpegian hainbat zauri zituela ikusi zuten. Segurtasun Sailaren arabera, biktima berak esan zien bi gizonek eta emakume batek jo zutela, eta ibilgailu batean indarrez sartzen saiatu zirela. Gizonak, ordea, kontra egin zien, eta pertsona batzuk laguntzera joan zirenez, ustezko bahitzaileek ihes egitea erabaki zuten.
Gizon zauritua Errenteriako osasun zentrora eraman zuten han artatzeko.
Ertzainak ikertzen hasi ziren, eta atzo egin zuten topo ustezko erasotzaileekin, eta gizon bat eta emakume bat atxilotu zituzten. Hirugarren gizonaren bila jarraitzen du Ertzaintzak.
